رباعيــــــــــــــــــــــــــــــــــــــــــــــات

مرحب ربيع مرحب ربيع مرحبه
يا طفل ياللى ف دمى ناغا و حبا
علشان عيونك يا صغنن هويت
حتى ديدان الأرض و الأغربه
عجبى !!
فتحت شباكى لشمس الصباح
ما دخلش منه غير عويل الرياح
و فتحت قلبى عشان أبوح بالألم
ما خرجش منه .. غير محبه و سماح
عجبى !!
غمست سنك فى السواد يا قلم
علشان ما تكتب شعر يقطر ألم
مالك جرالك إيه يا مجنون ... و ليه
رسمت وردة و بيت و قلب و علم
عجبي !!
انا الذى عمرى اشتياق فى اشتياق
و قطر داخل فى محطة فراق
قصدت نبع السم و شربت سم
من كتر شوقى و عشمى فى الترياق
عجبى !!
انا الذى عشت الزمن مضيعة
بروح حزينة معفنة مضعضعة
زرعت شجرة سنط لجل انجرح
لقيتها شعر البنت و مفرعة
عجبى !!
لو فيه سلام فى الأرض و طمان و أمن
لو كان مفيش و لا فقر و لا خوف و جبن
لو يملك الانسان مصير كل شئ
انا كنت أجيب للدنيا ميت ألف إبن
عجبى !!
العشب طاطا للنسايم ونخ
أخضر طرى مالهش فى الحسن أخ
عصفور عبيط أنا .. غاوى بهجة و غنا
ح انزل هنا .. و انشا لله يهبرنى فخ
عجبى !!
أوصيك يا إبنى بالقمر و الزهور
أوصيك بليل القاهرة المسحور
و إن جيت فى بالك .. إشترى عقد فل
لأى سمرا ... و قبرى إوعك تزور
عجبى !!
غمض عينيك و ارقص بخفة و دلع
الدنيا هى الشابة و انت الجدع
تشوف رشاقة خطوتك تعبدك
لكن انت لو بصيت لرجليك .. تقع
عجبى !!
حاسب من الأحزان و حاسب لها
حاسب على رقابيك من حبلها
راح تنتهى و لابد راح تنتهى
مش انتهت أحزان من قبلها ؟
عجبى !!
يأسك و صبرك بين إيديك و انت حر
تيأس ما تيأس الحياه راح تمر
أنا دقت مندا و مندا عجبى لقيت
الصبر مر و برضك اليأس مر
عجبى !!
و لدى نصحتك لما صوتى اتنبح
ما تخافش من جنى و لا من شبح
و ان هب فيك عفريت قتيل إسأله
ما دافعش ليه عن نفسه يوم ما اندبح ؟
عجبى !!
و لدى إليك بدل البالون ميت بالون
انفخ و طرقع فيه على كل لون
عساك تشوف بعينيك مصير الرجال
المنفوخين فى السترة و البنطلون
عجبى !!
خوض معركتها زى جدك ما خاض
صالب و قالب شفتك بامتعاض
هى كده .. ما تنولش منها الأمل
غير كده .. ما تنولش منها الأمل
غير بعد صد و رد و وجاع مخاض
عجبى !!
كام اشتغلت يا نيل فى نحت الصخور
مليون بئونه و ألف مليون هاتور
يا نيل أنا ابن حلال و من خلفتك
و ليه صعيبه على بس الأمور
عجبى !!
منين أجيبها كلمه متألمة
لعبية فايره حايره و مصممة
منين أجيب كلمه تكون بنت أرض
تشفى اللى ما شافهوش كلام السما
عجبى !!
أنا قلت كلمة و كان لها معنيين
كما بطن واحده و توأمين زين و شين
لو دنيا شر .. التوأم الخير يموت
لو دنيا خير .. الشر ح يعيش منين ؟
عجبى !!
أنا اللى بالأمر المحال اغتوى
شفت القمر نطيت لفوق فى الهوا
طلته ما طلتوش إيه انا يهمنى
و ليه ... ما دام بالنشوة قلبى ارتوى
عجبى !!
بره القزاز كان غيم و أمطار و برق
ما يهمنيش – انا قلت – ولا عندى فرق
غيرت رأيى بعد ساعة زمان
و كنت فى الشارع ... و فى الجزمة خرق
عجبى !!
عينى رأت مولود على كتف أمه
يصرخ تهنن فيه يصرخ تضمه
يصرخ تقول يا بنى ما تنطق كلام
ده اللى ما يتكلمش يا كتر همه
عجبى !!