رباعيات..............................

موضوع: رباعيات.............................. 12/8/2007, 19:11

ياللى نصحت الناس بشرب النبيت
مع بنت حلوة .. و عود, و ضحك, و حديت
مش كنت تنصحهم منين يكسبوا
تمن ده كله ؟ .. والا يمكن نسيت
عجبى !!

ما حد فى الدنيا دى واخد جزاته
و لا حد بيفكر فى غير لذاته
ما تعرفيش يا حبيبتى .. أنا و انتى مين ؟
إنتى عروس النيل .. و انا النيل بذاته
عجبى !!

رقاصة خرسا و رقصة من غير نغم
دنيا .. يا مين يصالحها قبل الندم
ساعتين تهز بوجهها يعنى لا
يترجرجوا نهديها يعنى نعم
عجبى !!
[size=21]إخطفنى ياللى تحبنى ع الحصان
الدنيا قالت يوم فى ماضى الزمان
إخطفنى ياللى تحبنى ع الفرس
الدنيا قالت .. قام خطفها الشيطان
عجبى !!

من بين شقوق الشيش و شقشقت لك
مع شهقة العصافير و زقزقت لك
نهار جديد انا .. قوم نشوف نعمليه
انا قلت يا ح تقتلنى .. يا ح اقتلك
عجبى !!

قلبى عليل يا ناس و فى الكاس دواه
مديت له إيدى شربت م اللى حواه
جنبى الشمال خف .. اليمين اتوجع
و إيه يداوى الكبد م اللى كواه
عجبى !!
.. دى مذكرات و كتبتها من سنين
فى نوته زرقا لون بحور الحنين
عترت فيها .. رميتها فى المهملات
و قلت أما صحيح كلام مخبولين
عجبى !!
دخل الشتا و قفل البيبان ع البيوت
و جعل شعاع الشمس خيط عنكبوت
و حاجات كتير بتموت فى ليل الشتا
لكن حاجات أكتر بترفض تموت
عجبى !!
- الدنيا من غير الربيع ميته
و رقة شجر ضعفانه و مفتفته
- لأ يا جدع غلطان تأمل و شوف
زهر الشتا طالع فى عز الشتا
عجبى !!
ياللى انت بيتك قش مفروش بريش
تقوى عليه الريح .. يصبح مفيش
عجبى عليك حواليك مخالب كبار
و ما لكش غير منقار و قادر تعيش
عجبى !!
سمعت نقطة ميه جوه المحيط
بتقول لنقطه ما تنزلي شفى الغويط
أخاف عليكى م الغرق .. قلت انا
ده اللى يخاف م الوعد يبقى عبيط
عجبى !!
جالك أوان و وقفت موقف وجود
يا تجود بده يا قلبى يا بده تجود
ما حد يقدر يبقى على كل شئ
مع إن – عجبى – كل شئ موجود
عجبى !!
جالك أوان و عرفت مشى الجنايز
كيف شفتها يا عبد رب اللذايذ
قال : شفت شيل بالحيل فقير أو أمير
كما شالوا فى الخمامير فواضى القزايز
عجبى !!
أنا كنت شئ و صبحت شئ ثم شئ
شوف ربنا .. قادر على كل شئ
هز الشجر شواشيه و وشوشنى قال :
لابد ما يموت شئ عشان يحيا شئ
عجبى !!
يا مشرط الجراح أمانة عليك
و انت ف حشايا تبص من حواليك
فيه نقطة سوده فى قلبى بدأت تبان
شيلها كمان .. و الفضل يرجع إليك
عجبى !!
كيف شفت قلبى و النبى يا طبيب
همد و مات والا سامع له دبيب
قاللى لقيته مختنق بالدموع
و مالوش دوا غير لمسه من إيد حبيب
عجبى !!
تسلم يا غصن الخوخ يا عود الحطب
ييجى الربيع .. تطلع زهورك عجب
و انا ليه بيمضى ربيع و ييجى ربيع
و لسه برضك قلبى حتة خشب
عجبى !!
بحر الحياه مليان بغرقى الحياه
صرخت خش الموج فى حلقى ملاه
قارب نجاه ! .. صرخت قالوا مفيش
غير بس هو الحب قارب نجاه
عجبى !!
فارس وحيد جوه الدروع الحديد
رفرف عليه عصفور و قال له نشيد
منين منين .. و لفين لفين يا جدع
قال من بعيد و لسه رايح بعيد
عجبى !!
كان فيه قمر كأنه فرخ الحمام
على صغره دق شعاع شق الغمام
أنا كنت حاضر قلت له ينصرك
إشحال لما خح تبقى بدر التمام
عجبى !!
النهد زى الفهد نط اندلع
قلبى انهبش بين الضلوع و انخلع
ياللى نهيت البنت عن فعلها
قول للطبيعة كمان تبطل دلع
عجبى !!
صوتك يا بنت الإيه كأنه بدن
يرقص يزيح الهم يمحى الشجن
يا حلوتى و بدنك كأنه كلام
كلام فلاسفة سكروا نسيوا الزمن
عجبى !!
كرباج سعاده و قلبى منه انجلد
رمح كأنه حصان و لف البلد
و رجع لى نص الليل و سألنى .. ليه
خجلان تقول انك سعيد يا ولد
عجبى !!
مزيكة هادية الكون فيها انغمر
و صيف و ليل و عقد فل و سمر
يا هل ترى الناس كلهم مبسوطين
و يا هل ترى شايفين جمال القمر ؟
عجبى !!
إنشد يا قلبى غنوتك للجمال
و ارقص فى صدرى من اليمين للشمال
ما هوش بعيد تفضل لبكره سعيد
ده كل يوم فيه ألف ألف احتمال
عجبى !!
آه لو أنا و محبوبى جزنا الفضا
فى سفينة وحدينا .. و أشيا رضا
ساعة صفا تعجبنا نرجع لها
و الهم قبل ما ييجى ... يبقى مضى
عجبى !!
أنا إله الوجد رب الهيام
أضرب بسهم الوهم وهم الغرام
وهم الغرام من كتر ما هو لذيذ
رشقت انا ف صدرى جميع السهام
عجبى !!
حدوته عن جعران و عن خنفسه
اتقابلوا حبوا بعض ساعة مسا
و لا قال لهم حد اختشوا عيب حرام
و لا حد قال دى علاقة متدنسة
عجبى !!
ياللى عرفت الحب يوم و انطوى
حسك تقول مشتاق لنبع الغرام
ده الحب .. مين داق منه قطره .. ارتوى
عجبى !!
زحام و أبواق سيارات مزعجة
اللى يطول له رصيف .. يبقى نجا
لو كنت جنبى يا حبيبى أنا
مش كنت اشوف إن الحياة مبهجة ؟
عجبى !!
إيديا فى جيوبى و قلبلا طرب
سارح فى غربة بس مش مغترب
و حدى لكين ونسان و ماشى كده
و بابتعد ... ما اعرفش ... أو باقترب
عجبى !!
يا ميت ندامه ع القلوب الخلا
لا محبة فيها و لا كراهه و لا
حتى يا قلبى الحزن ما عادش فيك
معلهش ... لك يوم برضه راح تتملا
عجبى !!