رباعيات جاهين
إليهم ...
مع أن كل الخلق من أصل طين
و كلهم بينزلوا مغمضين
بعد الدقايق و الشهور و السنين
تلاقى ناس أشرار و ناس طيبين
عجبى !!
عجبى عليك .. عجبى عليك يا زمن
يا بو البدع يا مبكى عينى دما
إزاى أنا أختار لروحى طريق
و أنا اللى داخل فى الحياة مرغما
عجبى !!
مرغم عليك يا صبح مغصوب يا ليل
لادخلتها برجليا و لا كانلى ميل
شايلنى شيل دخلت أنا فى الحياة
و بكرة ح اخرج منها شايلنى شيل
عجبى !!
سنوات و فايته عليا فوج بعد فوج
واحدة خدتنى إبن و التانية زوج
و التالتة أب خدتنى و الرابعة إيه
إيه يعمل اللى بيحدفه موج لموج ؟
عجبى !!
و أنا فى الضلام.. من غير شعاع يهتكه
أقف مكانى بخوف و لا أتركه
و لما ييجى النور و اشوف الدروب
أحتار زيادة .. أيهم أسلكه ؟
عجبى !!
نظرت فى الملكوت كتير و انشغلت
و بكل كلمة ( ليه ؟ ) و ( عشانيه ؟ ) سألت
اسأل سؤال .. الرد يرجع سؤال
و اخرج و حيرتى أشد مما دخلت
عجبى !!
خرج ابن آدم م العدم قلت : ياه
رجع ابن آدم للعدم قلت : ياه
تراب بيحيا .. و حى بيصير تراب
الأصل هو الموت والا الحياة ؟
عجبى !!
ضريح رخام فيه السعيد اندفن
و حفره فيها شريد من غير كفن
مريت عليهم .. قلت يا للعجب
لاتنين ريحتهم فيها نفس العفن
عجبى !!
يا ما صادفت صحاب و ما صحبتهمش
و كاسات خمور و شراب و ما شربتهمش
أندم على الفرص اللى أنا سبتهم
و الا على الفرص اللى ما سبتهمش
عجبى !!
و الكون ده كيف موجود من غير حدود
و فيه عقارب ليه و تعابين و دود
عالم مجرب فات و قال سلامات
ده ياما فيه سؤالات من غير ردود
عجبى !!
غدر الزمان يا قلبى مالهوش أمان
و حاييجى يوم تحتاج لحبة إيمان
قلبى ارتجف و سألنى .. أأمن بإيه ؟
أأمن بإيه محتار بقالى زمان
عجبى !!
يا باب أيا مقفول .. إمتى الدخول
صبرت ياما و اللى يصبر ينول
دقيت سنين .. و الرد يرجع لى : مين ؟
لو كنت عارف مين أنا .. كنت أقول
عجبى !!
أنا شاب لكن عمرى و لا ألف عام
وحيد و لكن بين ضلوعى زحام
خايف و لكن خوفى منى أنا
أخرس و لكن قلبى مليان كلام
عجبى !!
أحب أعيش و لو أعيش فى الغابات
أصحى كما و لدتنى أمى و ابات
طائر .. حيوان .. حشرة .. بشر .. بس أعيش
محلا الحياة .. حتى فى هيئة نبات
عجبى !!
سهير ليالى و ياما لفيت و طفت
و ف ليلة راجع فى الضلام قمت شفت
الخوف .. كأنه كلب سد الطريق
و كنت عاوز أقتله .. بس خفت
عجبى !!
كان فيه زمان سحلية طول فرسخين
كهفين عيونها و خشمها بربخين
ماتت .. لكن الرعب لم عمره مات
مع إنه فات بدل التاريخ تاريخين
عجبى !!
عجبتنى كلمة من كلام الورق
النور شرق من بين حروفها و برق
حبيت أشيلها ف قلبى .. قالت حرام
ده أنا كل قلب دخلت فيه اتحرق
عجبى !!
رقبة قزازة و قلبى فيها انحشر
شربت كاس و اتنين و خامس عشر
صاحبت ناس م الخمرة ترجع وحوش
و صاحبت ناس م الخمرة ترجع بشر
عجبى !!
كل اللى فى الخمارة صابهم جنون
صبحوا الرجال يتبادلوا كاس المنون
و بدم و نبيت انكتب ع الجدار
" يا ميت ندامة ع اللى قلبه حنون "
عجبى !!
قالوا الشقيق بيمص دم الشقيق
و الناس ما هياش ناس بحق و حقيق
قلبى رميته و جبت غيره حجر
داب الحجر ... و رجعت قلبى رقيق
عجبى !!
يوم قلت آه .. سمعونى قال فسد
ده كان جدع قلبه حديد و اتحسد
رديت على اللايمين أنا و قلت .. آه
لو تعرفوا معنى زئير الأسد
عجبى !!